黑椒蘑菇飯

有時上網睇食譜，見到邊D簡單易煮、自己會鍾意食、整出黎應該都會好食又或者想挑戰下的食譜，都會默默Bookmark或者抄低佢，呢個食譜其實都抄低左一段時日，一直都未整因為實在太多其他野想整。呢個蘑菇飯既味道同KFC既係兩碼子既事，只係都好食，各有各美味。留意牛油加麪粉既部分，麪粉可以逐少加然後炒勻，第一次我一野倒哂D麪粉落去，牛油又唔夠多，搞到一舊舊咁，即使加左雞湯都係救唔到要倒左佢，結果第二次先整到，所以，心急真係煮野食既大忌。

材料︰
‧白飯……2碗
‧罐頭蘑菇(小)……1罐(因為我好鍾意食蘑菇，所以用左2罐)
‧蒜蓉……1茶匙
‧中筋麪粉……1/2湯匙
‧雞湯……150mL
‧蠔油……1湯匙
‧糖……1/4茶匙
‧鹽……適量
‧黑椒……1茶匙
‧牛油……1湯匙
‧油……1/2湯匙

做法︰

1. 白米洗淨，加入適量的水煮熟。
2. 蒜頭磨蓉，罐頭蘑菇隔水備用。
3. 平底鍋加入少許油，加入蒜蓉爆香後，加入蘑菇炒香盛起備用。
4. 平底鍋抹乾淨後，開中火，加入牛油，融化成液體後逐少加入中筋麪粉炒勻。
5. 加入雞湯、蠔油拌勻，加入蘑菇慢火煮熱，加入鹽、糖及黑椒調味。
6. 煮至適當的濃稠度盛起，淋上白飯即可食用。

比個LIKE我LIKE你︰

 https://www.facebook.com/chengtszyingcooking

Follow me on instagram︰

https://www.instagram.com/chengtszyingcooking/

呢個食譜黎自︰

http://sweetheartkitchen.com/recipes/mushroom-rice/

牛油果大蝦香草醬意粉

出街食得野多，有時食到好食既，都希望可以通過味覺同想像，自己整番一樣，甚至係更加好食既野出黎。呢個其實構想左好耐，無食譜跟既好處就係自由度大，自己想要咩味都可以自己調教出黎。牛油果係近年新興既健康美食，用黎整牛油果醬係一流，再加埋香草醬落去整意粉，清新不膩，好適合炎炎夏日無胃口既天氣。

材料︰
‧大蝦……2隻(鍾意食蝦可以落多D)
‧意粉……2束(二人份量)
‧牛油果……1個
‧香草醬Pesto Sauce……2湯匙
‧羅勒葉(新鮮)……3片(如買不到可不加)
‧黑椒……適量
‧鹽……適量

做法︰

1. 牛油果切開挖出果肉，用叉子壓成醬狀，加入香草醬、黑椒及鹽拌勻備用。(試味調出合適的味道)
2. 煲滾水，加入適量的鹽，放入意粉煮5-7分鐘(觀察意粉發脹的情況，可夾起一兩條試試是否煮熟)，倒去大部分水，瀝乾意粉，留起少量意粉水備用。
3. 蝦切去蝦頭，去殼清理蝦腸。
4. 羅勒葉切絲備用。
5. 平底鍋加入適量的油，加入羅勒葉炒香，放入大蝦略煎30秒。
6. 加入意粉及香草牛油果醬炒勻（如太難炒開意粉，可加入留起的意粉水），上碟後即可食用。

比個LIKE我LIKE你︰

 https://www.facebook.com/chengtszyingcooking

Follow me on instagram︰

https://www.instagram.com/chengtszyingcooking/

呢個食譜黎自︰

係餐廳食過類似自己撞出來的。

青蘋果隱形蛋糕

一睇個食譜就好想試整，因為我都幾鍾意食蘋果，特別係青蘋果，甜中帶酸又爽，第一次整ON99拎左焗包既長方形模來整，D蛋糕漿未入爐都已經少少少少咁滲出來，好在最後都焗到成形(不過就無人地整得咁靚，所以下次都係要買個正規長方形蛋糕模黎整)，仲有，人地叫得隠形蘋果蛋糕係因為蘋果切到好薄，我呢就切到有厚有薄咁認真失禮。只不過味道係好食的，作為飯後甜品清新得來又唔會太甜太膩，不妨一試啊。(原食譜仲整左個醬的，我因為怕甜所以覺得就咁都OK)

材料：

‧雞蛋……2隻

‧糖……50g

‧無鹽牛油……20g

‧牛奶……100mL

‧鹽……1小撮

‧雲呢拿香油……1湯匙

‧低筋麪粉……70g

‧青蘋果……3個（如果想甜啲可以用富士蘋果或者王林蘋果）

做法：

1. 雞蛋置於碗內，加入糖用打蛋器打勻。
2. 無鹽牛油加熱至液體化，放涼後加入蛋液中。
3. 加入牛奶、鹽及雲呢拿香油，打勻後加入已過篩的低筋麪粉，攪勻至沒有粉粒備用。
4. 青蘋果削皮切薄片，薄片置於大碗內，倒入混合液拌勻，使所有薄片均沾上混合液。
5. 長方焗模鋪上焗爐紙（如用一般圓形焗模可不鋪），把薄片均勻地鋪在焗模內，餘下的混合液倒入焗模中。
6. 焗爐預熱至170至175度。
7. 將焗模放入焗爐焗45分鐘，取出後放涼切開即成。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

https://www.facebook.com/Dealmoon/videos/10154771946281919/

焗紫薯仔

呢隻紫薯仔係我去放題都一定會叫來吃的小食，一來甜度夠，二來細細粒方便食，咁岩我啊娘見到有一袋袋急凍既賣，當然要馬上入手而且整來食下，之所以蒸完要再焗係因為隔水蒸完其實紫薯仔入面仲有好多水份，而且會腍到好難拎起來吃，焗一焗就可以收乾佢入面過多既水份之餘，外表有少少脆口提升食時口感，作為小食，實在一流，每次出爐，總會有唔知幾多粒被屋企人拎下一粒拎下一粒就清哂。

材料：

‧紫薯仔……1袋

做法：

1. 紫薯仔放於碟中，大火隔水蒸紫薯仔10分鐘。
2. 預熱焗爐200度。
3. 焗盤鋪上焗爐紙，把已蒸熟的紫薯仔平均放於焗盤上，放入焗爐焗10分鐘放涼即成。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

自己胡亂試出來。

雞肉豆腐漢堡

天文台總係響放工先黎掛八號，玩到一班打工仔陀陀轉，放工去超市買野好似打仗咁，大家都驚無野賣個個咩都搶，因為本身都打算整呢個漢堡，材料唔算複雜好在都仲買到，冒住大風大雨番去都幾係野，所以一眾打風落雨都仲要去買餸煮飯的人們都是十分十分偉大的，哈哈。整呢個漢堡其實唔難，只不過豆腐如果榨唔乾水煎既時候就好易會散哂，下次如果時間充裕，應該可以煎得再靚仔D。

材料︰
‧雞胸肉……200g(如果想方便可以直接用免治雞肉)
‧硬豆腐/板豆腐/木綿豆腐……1盒(400g)
‧雞蛋……1隻
‧洋蔥……半個
(調味料)
‧醬油……2湯匙
‧味醂……1湯匙
‧糖……1茶匙
‧麻油……1湯匙
‧米酒……1湯匙
‧胡椒粉……適量
‧麪粉……2湯匙(我用左高筋麪粉)

做法︰

1. 雞胸肉切碎並剁至起膠(如用免治雞肉則可省去此步驟)。
2. 硬豆腐壓碎並壓出所有水份(壓得愈乾漢堡會少D水份無咁易散)。
3. 洋蔥切碎(切至盡量細粒)。
4. 把所有材料放入大碗內，與調味料搓勻。
5. 肉糰分成若平份搓圓再壓扁成漢堡的樣子。
6. 平底鍋放油，細火慢煎漢堡2-3分鐘，翻轉另一面煎至金黃，上碟可配茄汁或羅勒醬食用。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

https://icook.tw/recipes/145212

炒烏冬

上次整壽喜燒用剩左D烏冬，所以就整個炒烏冬食下。其實本身都好鍾意食烏冬，佢唔似粗麪咁滯，又有D彈牙，無論放湯好炒好撈又好，我都好喜歡吃(7-11個烏冬撈有一期我成日食，最愛落燒汁撈，所以我今次都用左燒汁炒)，上面加既明太子有畫龍點睛既效果(佢唔係只係裝飾用架)，好在程生有叫買，大家不妨炒完加D撈埋黎食，別有一番風味架。

材料︰
‧烏冬……2個
‧本菇……1包(可換成其他菇類)
‧蟹棒……3條(原食譜用蟹柳，咁岩見有蟹棒所以改左用)
‧洋蔥……1個
‧蒜頭……3小粒
‧明太子……適量(可不加)
‧蔥……適量(可不加)
(汁料)
‧日式燒汁……2湯匙
‧老抽……1茶匙
‧糖……1茶匙

做法︰

1. 烏冬放入滾水，以筷子攪散滾2-3分鐘，瀝乾水分備用。
2. 洋蔥切條，蒜頭磨蓉，蟹棒撕碎，本菇切去根部略洗，撕成條狀備用。
3. 在平底鍋中加入1湯匙油，中火加入蒜蓉及洋蔥炒香。
4. 加入本菇略炒，再加入烏冬炒鬆，分3次加入汁料炒勻，確保所有烏冬上色。(可略試味，如不夠鹹可因應個人口味加多些日式燒汁)
5. 加入蟹棒略炒，上碟後加入適量的明太子及蔥作裝飾即成。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

http://sweetheartkitchen.com/recipes/stir-fried-udon/

(原食譜汁料既部分係用醬油，我改左用日式燒汁，因為呢隻汁真係百搭好用又好味，建議大家可以係JUSCO買定支看門口)

壽喜燒

壽喜燒其實可以話係無難度既日本美食，類似中國既打邊爐，不過個湯底就甜甜地，而且所有材料配白飯食係一流，好適合諗餸諗到頭爆唔知煮咩既人士試一試。

材料︰
‧蒟蒻絲……1包
‧牛肉……250g(切薄片)
‧豆腐……200g(我用左一盒)
‧日本大蔥……2根
‧金菇……2包(原食譜係無既我自己加)
‧洋蔥……1個(原食譜係無既我自己加，加左個湯會甜D)
‧蛋……1隻
(湯料)
‧水……1杯(約150mL)
‧醬油……約3/4杯(約100mL)
‧味醂……1/2杯(約75mL)
‧糖……2湯匙

做法︰

1. 蒟蒻絲倒去原包裝的水份後，用滾水汆燙後稍剪一下備用。
2. 豆腐切件，大蔥斜切成小段，金菇切去根部略洗，洋蔥切成條狀。
3. 在小鍋子裏混合湯料，用中火煮滾成湯汁備用。
4. 在壽喜燒專用鍋內加入1至2公分的湯汁，開中火煮滾後加入牛肉攤平，待肉變色後，把肉放到鍋的一邊，加入大蔥。
5. 以蔥段作隔開之用，在沒有牛肉的一邊加入蒟蒻絲(因蒟蒻絲會令牛肉變硬)，再把豆腐及其他配料放在鍋中空的地方。
6. 加入適量的湯汁滾起即可食用，可隨個人喜好一邊加入蛋及其他不同的配料食用。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

《看圖就能下廚，基本の料理︰煎炸攪滑、蒸炒拌燉樣樣行的祕訣》；檢見崎聰美著；胡汶廷譯；台灣廣廈有聲圖書有限公司；ISBN︰9789861302522