蔬菜焗雞

煮野食都係心血來潮。如果心情太不安就煮東西去。把食物洗淨、切件、等待，烹調期間聞到食物的香氣，都是我讓自己平靜下來的方法。對於未來的未知，我也有我的恐懼。但我也清楚明白，能夠在煮食中，在吃之中獲得快樂，已經是幸福的一種。黑醋加上雞肉和蔬菜的香味有一種簡單的味道。或者，一切簡單些，就會好的了。

材料︰
‧雞腿肉……4件
‧青椒……1個(原食譜係落半個，我鍾意食就隊左成個入去)
‧紅椒……1個(原食譜係落半個，我鍾意食就隊左成個入去)
‧紫洋蔥……1個(原食譜係落半個洋蔥，我覺得呢種個色都靚就換左)
‧蕃茄……2個
‧黑醋……2湯匙
‧黑椒……適量
‧鹽……適量
‧橄欖油……適量
‧迷迭香……適量

做法︰

1. 青椒、紅椒、蕃茄及紫洋蔥切小塊。
2. 雞腿肉洗淨置於焗盤內，加入的切小塊的青椒、紅椒、蕃茄及紫洋蔥，以橄欖油、鹽、黑椒、迷迭香拌勻。
3. 焗爐預熱至200度，放入焗盤焗45至50分鐘至雞肉全熟即成。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

http://www.daydaycook.com/blog_page/tc/details/73881/index.html

鹽麴南瓜煮

鹽麴呢種東西其實我都唔係太知係咩來(後來去睇下就知個做法http://4fcooking.blogspot.hk/2013/05/blog-post.html)，我係買現成來整的(見各大日式超市，近來連惠康都好似有)，用來煮野食，甜甜地係幾好味的，呢個唔難整，係切南瓜個野真係出盡九牛二虎要將冰山劈開咁樣，南瓜好有益的，得益整定凍食都應該幾正。

材料︰
‧南瓜……半個(約550g)
‧黃砂糖……1湯匙
‧鹽麴……3湯匙
‧水……1 1/4杯(視乎南瓜份量調整)
(醬汁)
‧南瓜水……1/4杯
‧醬油……1湯匙
‧黃砂糖……1茶匙

做法︰

1. 南瓜去蒂連皮切塊，均勻抹上黃砂糖，帶皮的一面朝下靜置約15分鐘。
2. 鹽麴和水混合後倒入鍋內(水的高度與南瓜相約)，放入南瓜大火煮滾後轉細火。
3. 剪一張跟鍋面同大小的烘焙紙，覆蓋在南瓜面上煮約10至15分鐘至南瓜熟軟(筷子可輕易插入)。
4. 取出1/4杯南瓜水，加入醬油及黃砂糖煮至濃稠，淋在南瓜上即成，熱食凍食俱可。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

http://belleslab.pixnet.net/blog/post/151851578-%E7%83%B9%E3%80%82%E9%B9%BD%E9%BA%B4%E9%9B%9E%E8%85%BF%E6%8E%92%E3%80%81%E9%B9%BD%E9%BA%B4%E5%8D%97%E7%93%9C%E7%85%AE%E3%80%81%E9%B9%BD%E9%BA%B4%E6%BC%AC%E9%87%8E%E8%8F%9C-sh

日式抹茶菠蘿包

呢個我想試整左好耐，因為用既係日製高筋麪粉，所以包身係好綿密好好食既，至於個皮就因為第一次整有少少失手裂左，下次再試整可可皮個陣再做好啲，賣相應該會再好啲既，皮脆包軟，是之為菠蘿包真諦（至少我係咁覺得既）。

材料：

（麪糰）

·高筋麪粉⋯⋯300g

·乾酵母⋯⋯6g

·牛奶⋯⋯12mL

·糖⋯⋯45g

·鹽⋯⋯5g

·水⋯⋯145g

·打發蛋液⋯⋯25g

·無鹽牛油⋯⋯30g

（抹茶菠蘿皮）

·無鹽牛油⋯⋯40g

·糖⋯⋯70g

·低筋麪粉⋯⋯125g

·抹茶粉⋯⋯7g（原食譜係用覆盆子粉既，因為搵唔到所以試抹茶粉，如果想食原味也可全部換成低筋麪粉，也可試試可可粉）

做法：

1. 麪糰材料除無鹽牛油外全部攪拌（原食譜用機，我無所以用手搓），之後加入切成小粒的無鹽牛油搓至光滑及拉開有薄膜，置於已抹油的碗內室溫發酵1小時。
2. 準備菠蘿皮，先把無油牛油用打蛋器打軟，加入糖打至羽毛狀淡黃色。
3. 分幾次加入蛋液攪勻（看到蛋液被吸收再加，如此類推），分2次加入低筋麪粉及抹茶粉攪勻，用保鮮紙包起搓成長條狀，置於冰格冷藏30分鐘。
4. 取出已作第一次發酵的麪糰，輕輕拍打排出空氣，把麪糰分成60g一個的小麪糰（可分成9個）。
5. 取出已冷藏的菠蘿皮，切成30g一份，搓圓，用保鮮紙覆蓋並用重物壓成圓塊，置於麪糰上包好。
6. 在菠蘿皮上𠝹上井紋（方格狀），倒適量糖於碟上，菠蘿皮的一面沾糖，置於室溫先放15至20分鐘，然後再置於溫暖潮濕的地方再次發酵50至60分鐘。
7. 焗爐預熱至200度，麪糰放入焗爐焗20至25分鐘後放涼，至表面硬脆即成，可𠝹開麪包加入雪糕一同享用。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

http://www.ciao-kitchen.com/single-post/2016/08/24/%E6%97%A5%E5%BC%8F%E5%86%B0%E6%B7%87%E6%B7%8B%E8%8F%A0%E8%98%BF%E9%BA%B5%E5%8C%85

醉雞翼

經常碌FB都係睇下有咩易整又岩食既野，呢個係毛記電視睇既原本以為係伏野，抱住一試無妨既心整一整，真心好食又易整，果然，好多野都係試過先好下判斷，常懷希望，總好過咩都唔試就話絕望，至少你試過，至少你無認命。

材料：

·雞翼⋯⋯1磅

·薑片⋯⋯3片

·鹽⋯⋯適量

·醉雞汁⋯⋯1支

做法：

1. 雞翼解凍，煲一鑊熱水，加入薑片滾1分鐘，加入雞翼中火滾8至10分鐘（水一定要蓋過雞翼），取出過冷河，剪開一半。
2. 處理好的雞翼放入容器或密實袋內，加入醉雞汁後放於冰箱內一晚（醉雞汁要蓋過雞翼面），即可食用。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

http://tvmost.com.hk/201609151600_article_chickenwing

一鍋意粉

好緊張的時候唯有煮野食釋放壓力。一鍋完成，味道好也填飽肚，一切，盡力就好。

材料︰
‧意大利粉……半包(二人份量我通常都係用食指用大拇指尖黏起形成一圈來度份量，視乎番兩個人個食量)
‧車厘茄……１盒(大概20粒左右，可以用番茄代替，份量為1至2個左右)
‧啡磨菇……1盒(大概5至6粒)
‧白靈菇……1包
‧蟹柳……1包(可以用其他材料代替)
‧辣肉腸……2條
‧洋蔥……1個
‧獨子蒜……1粒(可以用蒜頭，大約用2至3粒)
‧巴馬臣芝士……適量
‧辣椒仔辣汁……適量(唔食得辣可以唔加)
‧黑椒……適量(可不加)
‧刁草……適量(可不加)
‧番茄醬……適量(可不加)
‧雞湯……500mL
‧水……適量

做法︰

1. 車厘茄切半，啡磨菇切片，蟹柳切粒，辣肉腸切片，白靈菇切去底部。
2. 獨子蒜切碎粒，洋蔥切絲。
3. 平底鍋(最好有少少深度個種，唔係會瀉哂出黎)落油，開大火，落蒜頭和洋蔥爆香。
4. 加入車厘茄、啡蘑菇、白靈菇、辣肉腸略炒。
5. 加入意粉、雞湯(可先加400mL，之後一邊滾一邊加)、番茄醬，煮大約8至10分鐘至收汁(時間請視乎意粉包裝而定，如雞湯不夠可加入適量的水煮至意粉稔身)，期間需不時攪拌以免痴底，最後可加入蟹柳粒。
6. 加入黑椒、刁草及辣椒仔辣汁，熄火後加上適量的巴馬臣芝士即成。

‧比個LIKE我LIKE你︰

 https://www.facebook.com/chengtszyingcooking

呢個食譜黎自︰

參考人地一鍋熟意粉個做法再自由搭配材料。

煙三文魚白蘑菇意大利飯

N耐之前煮過一次意大利飯，每次煮其實都係耐性既考驗同試煉。近來心情時常處於低谷，做點好吃的作為人生小小鼓勵幫自己同身邊人打打氣。唔呃你亦唔係賣花讚花香，呢個真係超級極度好食，只要你肯企係個爐前比耐性等，地獄之後是光明。

材料︰
‧意大利米……150g (睇你食幾多，我無特登量度)
‧煙三文魚……100g
‧巴馬臣芝士……30g
‧牛油……20g
‧洋蔥……1/4個(我以為呢個係一人份加埋唔小心睇錯，隊左成個洋蔥落去，開始以為好多，原來煮下煮下佢會同啲意大利米融為一體然後超級好食，所以落多少少都可以)
‧白蘑菇……4粒(我又係落好多因為我好鍾意食)
‧蒜蓉……2瓣
‧白酒……30mL(因番落意大米既份量着量加減，酒味其實會係煮個陣揮發但好香)
‧雞湯……500mL(同白酒做法，都係因番落意大米既份量着量加減)
‧蘿蔔苗……適量(原食譜係用火箭菜，因為買唔到又見佢幾得意就買來試下，比豆苗好食因為無草青味，加埋去煮會有奇異牽絲的視覺效果，好正，可留起幾條放面做裝飾)
‧鹽……適量(因為用左雞湯，所以其實夠味，我係無落鹽的，建議自己一路煮一路試味決定落唔落)
‧黑胡椒……適量

做法︰

1. 白蘑菇擦乾淨切片，洋蔥切碎，蒜頭磨蓉，煙三文魚切碎備用。
2. 中大火燒熱平底鍋，加入牛油煮溶，炒徇蒜蓉並加入洋蔥略炒。
3. 加入意大利米炒2分鐘，加入白酒。
4. 加入白蘑菇炒至收水，分幾次加入雞湯煮至意大利軟硬適中，留意分次加湯的同時要不停攪拌意大利米，否則容易痴底。
5. 加入巴馬臣芝士、煙三文魚及黑胡椒，鹽則試味後再決定加入的份量。
6. 加入蘿蔔苗拌勻，上碟即可食用。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

http://www.daydaycook.com/recipe/tc/details/35321/index.html

‧

日式溏心蛋

去親食日本拉麪我其實至LIKE係隻溏心蛋，路過FACEBOOK見有教學又自己試下，最難係要剝殼因為水唔夠凍蛋殼就會痴實蛋白繼而好易整爛，發現原來剝蛋殼都可以靜心，專注係同工作無關既野既時候，總係最快樂既時候，一如蛋黃入口即溶個種滿足同快樂。

材料︰

‧味醂……1小碗

‧日本醬油……1小碗

‧水……1小碗

(留意小碗的份量是一樣的，如果唔想酒味咁勁可以落少啲味醂)

‧雞蛋……6隻

‧冰水……1大碗(浸雞蛋用，如果唔夠凍雞蛋會好難剝殼)

做法︰

1. 凍水落原隻雞蛋(未剝殼)，大火加熱，至水滾起計3分鐘，水滾期間不斷攪拌雞蛋。
2. 味醂、日本醬油及水倒入一個密實袋中。
3. 雞蛋滾起後放入冰水浸泡，雞蛋剝殼後放入已放汁料的密實袋中，冷藏1天後即可食用。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

https://www.facebook.com/presslogic.cookeys/videos/1130557713652119/

牛奶可可哈斯

第一次買日製高筋麪粉整麪包，麪粉摸上手好細好滑，估唔到原來同樣係高筋麪粉都會有分別。今次唔記得要等埋第二次發酵，唔知係咪因為咁無咁鬆軟，下次整其他口味既哈斯一次要跟足個step睇下有咩分別先。

材料：

（麪糰）

日製高筋麪粉⋯⋯212g

低筋麪粉⋯⋯20g

無糖可可粉⋯⋯18g

砂糖⋯⋯30g

脫脂奶粉⋯⋯8g

鹽⋯⋯3g

（其他）

即發乾酵母⋯⋯3g

牛奶⋯⋯185g(如用非日製高筋麪粉則用195g牛奶）

無鹽牛油⋯⋯15g(放室溫變軟至用手指按下會留下痕跡）

巧克力粒⋯⋯60g

高筋麪粉⋯⋯適量

做法：

1. 大碗中倒入所有麪糰用的材料，用打泡器混合，加入即發乾酵母再次混合，加入牛奶，以手拌勻，令麪粉和水份合為一體。
2. 將麪糰以手腕用力推展，中間可加入少量低筋麪粉搓至不沾手，加入無鹽牛油搓勻至平滑。
3. 將麪糰搓成圓形，放於碗內用保鮮紙蓋好，放於溫暖的地方至膨脹到2至2.5倍。（約1小時左右）
4. 將麪糰分成2等份，將麪糰推展，搓成圓形，以濕布蓋住10分鐘。
5. 將麪糰收尾的洞口朝上，用麪粉棍壓成10x27cm左右的長條形，撒上1/4巧克力粒，將左右兩邊向中心重疊，中心點約1cm厚，再撒上1/4巧克力粒。另一麪糰作法相同。
6. 從近處將麪糰捲起，捏住收尾洞口和兩邊接縫處。
7. 在焗盤鋪上牛油紙或烘焙紙，將麪糰收尾的洞好朝下，用濕有蓋住，放置溫暖的地方再次發酵成1.5至2倍。
8. 用篩撒上高筋麪粉，用刀在麪糰劃上五刀直線。
9. 焗爐預熱至200度，降溫至180度放入麪糰焗22分鐘左右，取出後待涼切開即可。

比個LIKE我LIKE你︰

 https://www.facebook.com/chengtszyingcooking

呢個食譜黎自︰
《在家也能簡單烘焙日式麵包－－手揉和麵包機都OK！零失敗的經典款麵包與手製沾醬》；伊塔倫倫著；卓文怡譯；悅知文化；ISBN︰9789865617431

黑麥蜂蜜麪包

其實係從來無打算過會試整呢類粗麥口味既麪包，因為自己本身都好少食，不過買整其他麪包既材料時有人要求想食，所以就上網搵食譜試下做，因為佢其實唔使點搓既關係，都算係易做的麪包，新手如你我不妨試做，話唔定會有驚喜。Btw，雖然加左蜂蜜同糖，但其實唔係好食到甜味，如果嗜甜不妨加果醬或其他野一齊食，風味應該更佳。

材料︰
‧黑麥麪粉……200g(我用既係brown bread flour，另外有一種係叫rye bread flour，我都唔知有咩分別，如有高人請指教)
(麪糰)
‧高筋麪粉……100g
‧乾酵母……1/2茶匙
‧糖……1/2茶匙
‧鹽……1/2茶匙

(其他)
‧蜂蜜……15g
‧水……200g
‧油……1湯匙

做法︰

1. 將所有麪糰材料放於碗內拌勻。
2. 蜂蜜加入水中拌勻，蜂蜜水加入麪糰碗內，用手大致搓成粗糙的麪糰。
3. 加入油至粗糙麪糰中搓勻，蓋上保鮮紙，置於室溫發酵至2倍大。(約1至1.5小時)
4. 擠出麪糰的空氣，用力搓幾分鏗，將麪糰放入已鋪牛油紙的長形烤箱內，蓋上保鮮紙令麪糰發酵至蓬鬆。(約45分鐘)
5. 焗爐預熱至220度，焗30至35分鏗至表面金黃。
6. 取出脫模，待麪包放涼後切開以免切口不平整及碎裂，即可食用。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

http://mrsblackcat.pixnet.net/blog/post/440457127-%E5%BE%B7%E5%9C%8B%E9%A2%A8%E5%91%B3%E2%80%94%E2%80%94%E9%BB%91%E9%BA%A5%E9%BA%B5%E5%8C%85-dark-rye-bread

中式糯米糍

我成日以為呢個就係糖不甩，原來係叫中式糯米糍。無論佢叫咩名，呢個都係我細個其中一樣好鍾意既甜食小吃。

材料︰
‧糯米粉……60g
‧糖……20g
‧水……100mL
‧花生……50g
‧芝麻……10g
‧紅糖……10g

做法︰

1. 糯米粉和糖一同倒入碟內，加入水攪勻，用保鮮紙包好(我與保鮮紙無緣，次次用都會失敗，保鮮紙會塌然後融埋。其實可以用另一隻大少少既碟蓋住有糯米粉漿既碟，防止倒汗水流入)，大火蒸15分鐘，完成後用筷子把糯米粉糰刮起待用。
2. 將花生放入保鮮袋內用木棍樁碎，連同芝麻放入白鑊炒香至金黃，放入碟內待涼，加入紅糖拌勻。
3. 加入糯米粉糰至碟內，邊用剪刀剪開粉糰邊沾上碟內的花生糖碎，即可食用。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

https://www.facebook.com/dimcookguide/videos/619740344848394/

麻花卷麫包

本來係想整個玫瑰花造型，本來係想整到有七彩咁既色。人生好多本來本來，發現做唔到個陣其實都唔需要氣餒，生命有時就係咁，愈想做個樣就愈做唔到，但個過程如果係快樂既，其實做唔做到，可能，已經唔係最重要。老生常談，知易行難。

材料︰

‧高筋麫粉……300g

‧幼砂糖……40g

‧鹽……3g

‧乾酵母……4g

‧蛋液……30g

‧牛奶……120g(我用左芒果木瓜味鮮奶)

‧淡忌廉……40g

‧無鹽牛油……20g

做法︰

1. 高筋麫粉、幼砂糖及鹽過篩，加入乾酵母、蛋液、牛奶、及淡忌廉搓成麫團。
2. 加入放軟的無鹽牛油，把麫團搓至光滑並能拉出薄膜。
3. 麫團用保鮮紙包好，於室温發酵約一小時至兩倍大。
4. 麫團等分成15份，把麫團搓成長條形，然後切成三條(不要切至頭部)，利用鬢三手辮的方法為麫團造型(中間的一條為B，左右兩條為A和C，把A拉至中間，然後把C疊在A的上面，再把B疊至中間，然後把A疊在B的上面，如此類推)，把已造型的長條形麫團由尾至頭的方向捲起，放在室温45分鐘再發酵至兩倍大。
5. 焗爐預熱至175度，完成發酵的麫團焗20分鐘完成。

比個LIKE我LIKE你︰

 https://www.facebook.com/chengtszyingcooking

冬蔭公雞翼

忙到天昏地暗的時候可以煮想食既野都係幸福既一種。冬蔭公湯就飲得多，冬蔭公雞翼都係第一次煮同食，買材料有少少煩但整左出來你就知一切都值，個種冬蔭香味同美味，真係無得比！梁祖堯呢個食譜真係好得！BTW檸檬葉好香，一路切一路想隊入口！

材料︰
(醃料)
‧南薑……1塊
‧香茅……2枝
‧檸檬葉……5片
‧泰式辣醬……2湯匙(一般泰國小鋪有售，藍色樽蓋)
‧油……1湯匙

‧雞翼……10隻
‧魚露……1湯匙
‧青檸……2個
‧糖……2茶匙
‧辣椒……適量

做法︰

1. 南薑、香茅、檸檬葉、紅蔥頭切碎，香茅拍扁令香味更突出，加入魚露、辣醬、油把雞翼醃15分鐘。
2. 冷鍋落油，燒熱，加入雞翼煎香兩面。
3. 倒入醃雞翼的香料和汁，如太乾可加入2湯匙水，加蓋以中火焗7分鐘至雞翼全熟。
4. 開蓋，加糖和青檸汁，如汁液太多可加生粉做成薄芡。
5. 磨少量青檸皮，加上辣椒即可。

比個LIKE我LIKE你︰

 https://www.facebook.com/chengtszyingcooking

呢個食譜黎自︰

http://food.ulifestyle.com.hk/restaurant/news/celebrityrecommendation/%E7%A5%96%E5%A0%AF%E4%B8%8B%E5%BB%9A+%E6%B3%B0%E5%BC%8F%E5%86%AC%E8%94%AD%E5%8A%9F%E9%9B%9E%E7%BF%BC