薑味焦糖燉蛋

終於的起心肝買左火槍同陶瓷杯，所以就趁得閒整一直好想食既Cream Brulee。由於本人好like食薑，於是又扭左少少，整左呢個薑汁味既Cream Brulee。成件事本來好簡單好易做完，但因為本人第一次整個時誤將幼鹽變成糖，結果當然係要由頭RE-DO一次。所以話，失魂野幾時都有。記住，燒左糖衣之後好儘快吃左佢，唔係變番灘水真係唔知搵邊個食啦，雖然，其實都食得既。

材料︰
‧蛋黃……2個
‧砂糖……35克
‧淡忌廉……200毫升
‧薑汁……1湯匙 (唔like薑味可以用番1/2茶匙雲呢拿香油)
‧黃糖……2湯匙 (做焦糖面用)

做法︰

1. 焗爐預熱至160度。
2. 蛋黃與砂糖混合，不用過度攪拌。
3. 淡忌廉用小火加熱至邊緣冒煙，出現小氣泡即可離火。
4. 逐少將淡忌廉加入蛋黃混合物，一邊加入一邊攪拌以免蛋黃被煮熟。
5. 加入薑汁(或雲呢拿香油)拌勻，將混合物過篩備用。
6. 準備焗盤，放上一條毛巾，再放入小陶瓷杯，將混合物輕手倒入陶瓷杯內，如杯面有小氣泡可用匙羹撇走或用牙籤戳破。(無焗爐其實都可以用隔水蒸既方法，做法係用錫紙包好小陶瓷杯，於鍋內煲至水滾，放入小陶瓷杯轉中火隔水蒸15分鐘亦可)
7. 焗盤內注入熱水，水位高度為小陶瓷杯的1/3高度。
8. 放入焗爐中下層焗25至30分鐘，取出後燉蛋表面會凝固，搖晃會微盪。
9. 燉蛋回落至室溫後放入雪櫃雪4小時或以上。
10. 取出後在燉蛋表面平均撒上黃糖，用火槍距離3至4吋將黃糖燒成脆皮糖衣，擱置5分鐘即可食用。(留意燒焦糖後45分鐘內食用燉蛋，否則焦糖會融化成水)

比個LIKE我LIKE你︰
https://www.facebook.com/chengtszyingcooking

呢個食譜黎自︰
http://sweetheartkitchen.com/recipes/creme-brulee/

給瑪德蓮的玫瑰小蛋糕

瑪德蓮蛋糕Madeleines本來是一種法式貝殼形的小蛋糕，偶爾在一家法國餐廳試過後相當難忘，查找食譜做法其實不難，難在要找到那個貝殼形的焗模，由於搵來搵去都找不到，忽發奇想就用了玫瑰花的。焗出來倒有點像燒賣，但近看那些玫瑰的紋理還是相當好看。底部仍然成功焗出應有的「肚臍」，味道因着檸檬皮蓉可喜清新，作為一個鬱悶午後的下午茶點，這是一個相當不俗的選擇。

材料︰
‧低筋粉……100g
‧泡打粉……1/2茶匙
‧鹽……1/4茶匙
‧雞蛋……2隻
‧雲呢拿香精……1/4茶匙
‧檸檬皮蓉……1個(只磨出黃色部分)
‧砂糖……70克
‧無鹽牛油……80克 (再用少許掃焗盤用) (牛油放室溫回軟)

做法︰

1. 在焗盤上掃少許牛油，灑上低筋粉並搖去多餘的麪粉，放入雪櫃備用。(如果用玫瑰花矽膠模就唔洗做呢個step)
2. 把低筋麪粉、泡打粉及鹽過篩拌勻備用。
3. 打發雞蛋至起泡，加入雲呢拿香精及檸檬皮蓉拌勻。
4. 以電動打蛋器高速打發雞蛋，分3次加入砂糖，打發至蓬鬆及拿起攪拌器可以蛋液拉出紋理 (約打發5分鐘)
5. 分3次加入已過篩的麪粉混合物，輕手拌勻，見沒粉粒即可停止攪拌。
6. 拿出小部分麪糊混合融解的牛油，再把牛油混合物加回麪糊，輕手拌勻，用保鮮紙封好，放入雪櫃冷藏最小1小時。
7. 預熱焗爐至180度。
8. 拿出麪糊「畢」入焗模內(正宗的是要用貝殼形焗模)，約滿至3/4，放入焗爐焗9分鐘至邊緣轉金黃，用手按壓中央有回彈感或以牙籤插入底部突起的「小肚臍」抽出後乾淨即成，脫模後放涼即可食用。(如以玫瑰花矽膠模焗就要焗15至18分鐘，因倒入的麪糊較多，需要較長的時間焗熟中心的部分)

比個LIKE我LIKE你︰
https://www.facebook.com/chengtszyingcooking

呢個食譜黎自︰
http://www.christinesrecipes.com/2013/05/madeleins.html?m=1

泰式生蝦汁

食泰式生蝦，除左講究蝦大唔大隻新唔新鮮，生蒜、辣椒同個生蝦汁可說是配角中的靈魂，如果無左個汁就咁啪啲蝦，雖然都新鮮，但成件事就總係好似爭左啲野咁。一點，嘩，生蝦個種鮮再配埋酸辣味，真係不得之了。

材料︰
‧魚露……1湯匙
‧青檸汁……1 1/2湯匙
‧蒜蓉……1/2湯匙
‧辣椒……2隻
‧糖……2湯匙

做法︰

1. 把辣椒切粒。
2. 放魚露及青檸汁，把所有材料除糖外攪混。
3. 落糖調味。
4. 把醬汁冷藏後即成。(汁料最多可保存7天)

比個LIKE我LIKE你︰
https://www.facebook.com/chengtszyingcooking

呢個食譜黎自︰
http://oysterkingonline.com/content/37-guide07

三色椒帶子肉腸米形意粉

米形意粉英文名係orzo，有日係超市見佢平平地十幾蚊一大包就膽粗粗買來試整下。三色椒的顏色一拼埋就即刻令人興奮到彈起。你知啦，當你抬頭望天見到灰濛濛一片真係幾沮喪架有時。好在，終於都放晴見到啊藍天白雲了。

材料︰
‧米形意粉……500g
‧三色椒……各1個
‧急凍帶子……1包
‧肉腸……2條
‧乾蔥……2粒
‧蒜頭……3個
‧雞粉……2茶匙
‧油……3湯匙

(醃料)
‧海鹽……適量
‧胡椒粉……適量

做法︰

1. 急凍帶子解凍後用醃料略醃，三色椒及蒜頭切粒，肉腸及乾蔥切片。
2. 煲一鍋熱水，加1湯匙油及1茶匙鹽，水滾後放意粉滾6分鐘至熟後瀝水備用。
3. 平底鑊放2湯匙油，爆香蒜粒及乾蔥，加入肉腸略炒，再放入三色椒、意粉及雞粉炒勻，最後加入帶子略炒1至2分鐘即成。

比個LIKE我LIKE你︰
https://www.facebook.com/chengtszyingcooking

呢個食譜黎自︰
自己亂咁撞出來。

蜜糖芥末粟米包

曾經有人問過我一個無聊問題︰如果你一個人係荒島上面要生活一世，而你係餘下日子只可以KEEP住每日食一種食物，呢種食物會係咩？我諗都唔諗就答粟米，你就知我幾咁鍾意食。呢個包係我臨訓之前忽發奇想諗出來的，佢個賣相本來係想扮碌粟米，但因為麪糰都有一定彈性，要壓出井紋都唔易，兩塊葉都似似地，成件事都幾好笑但最重點係，佢真係好！好！味！囉！外脆內軟加埋鮮甜粟米味，大愛也！

材料︰(麪糰)
‧高筋麪粉……125g
‧無鹽牛油……10g
‧砂糖……8g
‧溫水……80mL
‧幼鹽……2g
‧乾酵母……2g

‧罐頭粟米……半罐
‧蜜糖芥末醬……1湯匙
‧掃面用蛋漿……適量

做法︰

1. 將乾酵母加入暖水中拌勻，放置10分鐘。
2. 將麪糰其他材料置入大碗內，加入酵母水搓勻至起筋 (拉開有薄膜)，推圓麪糰，收口向下，放在塗滿油的碗內，置於溫暖處 (約26至32度)發酵45分鐘。
3. 罐頭粟米瀝去水份，加入蜜糖芥末醬，雪凍備用。
4. 將麪糰碌成長條形，分成4份，搓圓蓋上保鮮紙讓麪糰鬆弛15至20分鐘。
5. 將麪糰分成4份 (1大︰A麪糰；2中︰B麪糰； 1小︰C麪糰，A用作包餡，B用作葉，C用作搓成長條圍於頂部)，先把A搓扁，包入適量的粟米，包好，收口向下置於已鋪牛油紙的焗盤上，於包面界上井紋(如圖1)，再把C的長條麪糰圍於頂部(如圖2)，壓扁兩片B麪糰放於A麪糰兩側作葉(如圖3)。
   
6. 麪糰作最後發酵 (置於溫暖處將約20至30分鐘)，麪糰發酵至兩倍大，輕手掃上蛋漿，放入已預熱至180度的焗爐焗15至18分鐘即成。

比個LIKE我LIKE你︰
https://www.facebook.com/chengtszyingcooking

呢個食譜黎自︰
學左麪糰做法自己撞出來，哈。

菠蘿炒飯

菠蘿炒飯本身其實唔難整，挖菠蘿肉出來個下先係考驗，由於菠蘿肉比較硬身，所以要整個完整菠蘿殼出來都唔係咁簡單。為食如我就一路片啲果肉出來一路食，個種甜美多汁真係未煮食先興奮。飯配上勁多的肉鬆及炸腰果真係相當好吃，我記得我細個個時最鍾意喪「畢」有肉鬆同腰果個啲飯來吃。原食譜有落提子乾的，因為本人好憎，所以直接SKIP左，想吃的話就係放菠蘿落去炒個時加埋落去。

材料︰
‧菠蘿……1個
‧雞蛋……1隻(打散)
‧乾蔥茸……1湯匙
‧咖哩粉……1湯匙
‧黃薑粉……1茶匙
‧莎樂美腸……25克(切粒)
‧芥蘭……30克(切粒) (我用左菜心代替)
‧白飯……2碗
‧炸腰果……適量
‧肉鬆……適量
‧芥花籽油……4湯匙

(調味料)
‧鹽……1茶匙
‧糖……1/2茶匙
‧胡椒粉……1/2茶匙

做法︰

1. 菠蘿橫切1/3作蓋，另在其餘2/3挖出果肉，取出70克切粒，菠蘿殼留用。
2. 燒熱2湯匙油，下雞蛋炒成蛋碎備用。
3. 燒熱2湯匙油，炒香乾蔥茸，下咖哩粉及黃薑粉炒香。
4. 加入莎樂美腸及芥蘭炒一會，再下白飯及調味料炒透。
5. 放入菠蘿及雞蛋碎炒勻，置於菠蘿殼中，鋪上肉鬆及炸腰果即可。

比個LIKE我LIKE你︰
https://www.facebook.com/chengtszyingcooking

呢個食譜黎自︰
http://hk.promotion.yahoo.net/cooking/2013080914614/

日本甜薯包

碰巧娘親買來超甜的日本甜薯，就應妹的要求做了這款麪包。日本甜薯甜度比之前的紫心蕃薯更勁，加上手工麪包可以包入喪多餡，那甜而不膩的甜薯味，真係食多幾個都覺得唔夠，為左令佢同之前既紫心蕃薯包區別開來，我就係網上睇下人地整包原來都有好多種造型方法，呢個好似個兜仔咁，最岩用來盛起甜甜的甜薯茸。

材料︰(麪糰)
‧高筋麪粉……250g
‧無鹽牛油……15g
‧鹽……2g
‧溫水……120mL
‧砂糖……30g
‧雞蛋……20g
‧乾酵母……4g
‧日本甜薯茸……120g

(餡料)
‧日本甜薯茸……160g

‧掃面用蛋漿……適量

做法︰

1. 將乾酵母加入暖水中拌勻，放置10分鐘。
2. 將麪糰其他材料置入大碗內，加入酵母水搓勻至起筋 (拉開有薄膜)，推圓麪糰，收口向下，放在塗滿油的碗內，置於溫暖處 (約26至32度)發酵45分鐘。
3. 將麪糰平均分割成8份，滾圓，讓麪糰鬆弛15至20分鐘。
4. 將麪糰按扁成圓形，頂部及底部各界一刀 (如圖1)，於界口處揭起並打交叉(如圖2)，造型成一個小盛器。
5. 於洞口的位置加上適量的日本甜薯茸，將包排放在已鋪牛油紙的焗盆上，進行最後發酵 (置於溫暖處將約20至30分鐘)。
6. 待麪糰發酵至兩倍大，輕手掃上蛋漿，放入已預熱至180度的焗爐焗15至18分鐘即成。

   

   圖1

   

   圖2

比個LIKE我LIKE你︰

https://www.facebook.com/chengtszyingcooking

呢個食譜黎自︰

《我愛手工麪包》；韋太編著；萬里機構‧飲食天地版社；ISBN︰9789621448842

原本人地用紫心蕃薯，我改左用甜薯。

http://tw.myblog.yahoo.com/carol-jay/article?mid=214703&prev=217796&next=213474&l=f&fid=38

呢個就係我參考人地麪包個造型方法，佢界四刀，但我記錯左兩刀，件事又WORK喎，鍾意既都可以跟番佢。

 

花雕焗明蝦

花雕醉蝦原來都唔係話咁易整，將啲蝦泡油個下真係彈到我WE嘩鬼叫唔係講笑，其實比油彈又洗咩驚啊，你啊媽 都比油彈足幾廿年咪一樣咁煮野過你吃，所以，食住家飯記住要心存感激煮野食過你吃個位啊！唔試過唔知原來蝦浸酒都會慢慢浸熟架哈哈哈。

材料︰
‧生蝦……半斤
‧花雕酒……半杯

(配料)
‧薑……4片
‧蔥……兩條 (切段)
‧乾蔥……1粒 (切片)

(醃料)
‧鹽……半茶匙
‧生粉……1湯匙

(汁料)
‧花雕酒……3湯匙
‧水……3湯匙
‧糖……1茶匙
‧生抽……1茶匙
‧生粉……半茶匙(拌水)

做法︰

1. 生蝦沖淨放入大碗內，倒入半杯花雕酒浸蝦，可放入雪櫃，至蝦靜止。
2. 切好其他配料。
3. 隔淨生蝦，灑少許鹽醃5分鐘。
4. 燒4湯匙油，生粉薄薄灑於蝦上，再把蝦放熱油內泡至9成熟，取出。
5. 剩餘油爆香配料，灒酒，將蝦回鑊，倒入適量汁料埋薄獻即成。

比個LIKE我LIKE你︰
https://www.facebook.com/chengtszyingcooking

呢個食譜黎自︰
以前D食譜抄落。

豆豉鯪魚炒油麥菜

細個老豆成日炒過我食，係隔離望下望下其實又幾容易，不外乎快炒加快炒，記住「祕」番豆豉鯪魚啲油出來，拎番少少來炒菜就好了，太多油，你唔肥真係我都膩啦。

材料︰
‧油麥菜……1斤
‧豆豉鯪魚……1罐

做法︰

1. 油麥菜切去頭部及切段，洗淨備用。
2. 豆豉鯪魚稍為瀝乾油份，切碎備用。
3. 用豆豉鯪魚內的油燒熱鑊，放入油麥菜及已切碎豆豉鯪魚快炒。
4. 加鑊蓋焗2至3分鐘即成。

比個LIKE我LIKE你︰
https://www.facebook.com/chengtszyingcooking

呢個食譜黎自︰
我啊爹自細教落。

玉子大馬站

好耐都無食過玉子豆腐了，連埋韭菜花同燒肉一齊炒，加埋鹹香蝦醬原來又幾好味。之不過玉子豆腐好鬼易散，一路切一路碎上咁真係唔係切豆腐咁易啊！

材料︰
‧玉子豆腐……3條
‧燒肉……4両(切件及拖水)
‧韭菜……4両
‧蒜肉……4粒(拍爛)
‧蝦醬……1湯匙
‧泰國甜酸醬……2湯匙

(汁料)
‧清水……3/4杯
‧雞粉……半茶匙
‧麻油……適量
‧胡椒粉……適量

‧紅椒絲……適量 (裝飾用)

做法︰

1. 玉子豆腐切厚件，煎香兩面備用。
2. 下油炒香蒜肉及燒肉，加入蝦醬炒香片刻，灒酒。
3. 加入汁料煮滾，以生粉水埋獻。
4. 放回玉子豆腐及韭菜煮滾，再撒上紅椒絲即成。

比個LIKE我LIKE你︰
https://www.facebook.com/chengtszyingcooking

呢個食譜黎自︰
以前D食譜抄落。

榛子朱古力方包

想話有一個豐足早餐唔一定要出去買麪包既，因為好鍾意食方包，所以就整左呢個榛子朱古力方包出來，一路焗一路聞到好香既朱古力味，鴛鴦既顏色真係一路切一路開心，唔信，你都可以試試。

材料︰(麪糰)
‧高筋麪粉……250g
‧無鹽牛油……20g
‧砂糖……15g
‧溫水……160mL
‧幼鹽……5g
‧乾酵母……4g

‧可可粉……5g
‧榛子朱古力醬……適量
‧掃面用蛋漿……適量

做法︰

1. 將乾酵母加入暖水中拌勻，放置10分鐘。
2. 將麪糰其他材料置入大碗內，加入酵母水搓勻至起筋 (拉開有薄膜)，推圓麪糰，收口向下，放在塗滿油的碗內，置於溫暖處 (約26至32度)發酵45分鐘。
3. 將麪糰拍摺成長形，讓麪糰鬆弛15至20分鐘。
4. 將麪糰按扁，分成兩份，一份加入可可粉搓勻，用麪粉棍輾薄成6 吋x 24吋的長形，並於上面塗上適量的榛子朱古力醬，另一份亦用麪粉棍輾薄成6 吋x 24吋的長形，將麪糰蓋在已塗果醬的麪糰上並輕輕壓實，麪糰兩邊向內摺1cm。
5. 將麪糰由上向下捲起，收口略為拖薄及壓實。
6. 放入已掃油的麪包模 (4吋 x6.5吋長方形焗模) 內，進行最後發酵 (置於溫暖處將約20至30分鐘)。
7. 待麪糰發酵至8成滿，輕手掃上蛋漿，放入已預熱至180度的焗爐焗15分鐘，再蓋上麪包模蓋或錫紙焗12分鐘，麪包出爐後脫模待涼。

比個LIKE我LIKE你︰
https://www.facebook.com/chengtszyingcooking

呢個食譜黎自︰
學左麪糰做法自己撞出來，哈。

士多啤梨沾朱古力

睇圖你一定會問白朱古力死左去邊，係，我懶醒咁以為白朱古力要座住熱水咁等佢融，搞左好耐佢融得來杰到死士多啤梨完全沾唔到囉搞到！嘥左啲白朱古力唯有單拖只用黑朱古力啦，整呢個野其實唔難但好易整到成手都係朱古力，但雪凍之後朱古力個種脆夾甜加埋士多啤梨既酸甜確係好食。只要你唔好好似我咁懶醒，應該好易整到個成品！記住朱古力係直！接！擺！入！鍋！度！融！啊！用！細！火！

材料︰
‧士多啤梨……12粒
‧白朱古力……155克
‧黑朱古力……60克

做法︰

1. 用小毛刷輕輕清洗士多啤梨，不要弄破外皮，抹乾備用。
2. 將白朱古力置於鍋內煮至融化，在士多啤梨頭部沾上朱古力至約2/3部分，瀝去過多朱古力後置於倒放於碟上待凝結。
3. 將黑朱古力置於鍋入煮至融化，稍冷卻，將已沾白朱古力的士多啤梨再沾上黑朱古力至1/3部分，倒放於碟上冷藏，待朱古凝結即成。

比個LIKE我LIKE你︰
https://www.facebook.com/chengtszyingcooking

呢個食譜黎自︰
以前D食譜抄落。

可樂雞翼

可樂雞翼實在係一個好方便既菜，需要材料唔多步驟亦唔麻煩，我怕肥就用健怡可樂來整，如果你想足味少少當然用番原裝可樂更滋味啦。

材料︰
‧雞翼……1磅 (約12隻)
‧蒜頭……3粒
‧可樂……1支
‧粗鹽……少許
‧豉油……少許
‧糖……少許

做法︰

1. 雞翼解凍洗淨，蒜頭拍爛。
2. 燒紅鑊落少許油。
3. 落蒜頭加少許粗鹽爆香。
4. 將雞翼落鑊煎至兩面金黃。
5. 加豉油、糖略炒，再加可樂 (剛蓋過雞翼少許即可)
6. 蓋好鑊蓋，用中火煮至汁濃，即可上碟。

比個LIKE我LIKE你︰
https://www.facebook.com/chengtszyingcooking

呢個食譜黎自︰
以前D食譜抄落。

日式沙律伴車厘茄芝士焗釀大蘑菇

又係一個亂咁來的創意好滋味，BASE ON人地既食譜，再根據個人喜好加加減減拼拼湊湊，大概就係煮野食之所以好玩既地方啦。

材料︰
‧沙律菜……1袋 (可買超市凱撒沙律包，裏面有芝士碎同麪包糠，好好味，包醬就留番下次)
‧溫室青瓜……4條
‧車厘茄……10粒
‧大蘑菇……2隻

(焗蘑菇用)
‧巴馬臣芝士碎……2至3湯匙
‧車厘茄……6至8粒
‧百里香……1/2茶匙
‧蕃茄醬……1湯匙
‧海鹽……少許
‧黑胡椒……少許

(沙律汁)
‧鎮江醋……3茶匙
‧蠔油……1 1/2茶匙
‧水……4茶匙
‧麻油……1/4茶匙
‧豉油……1/4茶匙

做法︰

1. 原隻大蘑菇以廚房紙抹乾淨，盡量不要濕水。
2. 焗爐預熱至180度。
3. 所有車厘茄切半備用。
4. 將蕃茄醬均勻塗在大蘑菇上，鋪上車厘茄。
5. 灑上少許海鹽、黑胡椒、巴馬臣芝士碎及百里香。
6. 放進焗爐20分鐘至芝士金黃即可。
7. 溫室青瓜刨薄片，加少許鹽拌勻，放置一旁讓它出水備用。
8. 調較沙律汁，青瓜與車厘茄一同加入沙律菜中，加入沙律汁拌勻，將焗好的大蘑菇置於沙律上即成。

比個LIKE我LIKE你︰
https://www.facebook.com/chengtszyingcooking

呢個食譜黎自︰
http://hk.knowledge.yahoo.com/question/question?qid=7007091100116
焗蘑菇個食譜我係YAHOO副刊睇到抄低，但搵唔番原LINK，原本人地有加火雞肉，但我唔嗜肉，所以SKIP左:P 如果自己LIKE既就將2片火雞片切絲係STEP(4)加埋入大蘑菇就可以。

香辣海皇闊麪

用袋裝海鮮就唔洗咁麻煩，香香辣辣闊條麪真係好惹味，由於加左少少雞醬，所以就有FUSION風味，我諗用來炒ANGELHAIR都一樣咁好食啊！

材料︰
‧意大利闆麪……150克
‧中蝦……180克 (我貪方便係超市買左袋急凍雜錦海鮮，入面有蝦有帶子有魷魚，幾方便~)
‧墨魚仔……100克 (如果似我咁就唔洗買呢個啦)
‧洋蔥……30克 (切碎) (我鐘意食洋蔥，唔理三七廿一隊左成個落去)
‧蒜茸……1湯匙
‧紅辣椒粒……1/2湯匙 (嗜辣如我隊左成隻辣椒落去)

(醃蝦料，醃其他海鮮都可以，如果份量多左自己按量加番醃料份量)
‧鹽……1/2茶匙
‧胡椒粉……1/4茶匙

(醬汁料)
‧雞湯……1/4杯 (我臨時又唔記得買，就用1/4杯水加1茶匙雞粉)
‧蕃茄醬……4湯匙
‧泰式酸甜辣椒醬……2湯匙 (即係雞醬其實)
‧檸檬汁……1茶匙
‧糖……2茶匙

做法︰

1. 鮮蝦去頭、殼及腸，留尾，洗淨抹乾，墨魚仔亦洗淨，一同加入醃料醃10分鐘。(用袋裝海鮮呢就解凍抹乾海鮮然後加醃料醃)
2. 預備大鍋沸水，放入1湯匙鹽，加入闊條麪，煮約7分鐘，撈起瀝乾，加入1湯匙芥花籽油拌勻備用。
3. 用中火燒熱2湯匙芥花籽油，加入洋蔥炒香，下蒜茸、紅辣椒粒炒片刻。
4. 最後加入中蝦及墨魚仔炒至略熟，加入醬汁料，煮約2分鐘，倒入麪條炒勻即可上碟。

比個LIKE我LIKE你︰
https://www.facebook.com/chengtszyingcooking

呢個食譜黎自︰
http://hk.promotion.yahoo.net/cooking/2013073114127/

藍莓果醬方包

係香港工作既人大部分都唔會有時間享受一個悠閒既早餐，取而代之係趕水趕命甩頭甩髻一邊咬住片包一邊趕出門口既番工mode，日復日年復年，有時都想話就算係咬住片包都可否係一塊有格調些許既包，於是乎就諗不如試下係搓麪糰個陣加埋果醬入去，咁咪唔洗搽醬都一樣可以咬住片果醬方包囉，就係咁，就整左呢款方包，切開之開看到那淡淡的紋理，成件事即刻升格左。

材料︰
(麪糰)
‧高筋麪粉……250g
‧無鹽牛油……20g
‧砂糖……15g
‧溫水……160mL
‧幼鹽……5g
‧乾酵母……4g

‧藍莓果醬……適量
‧掃面用蛋漿……適量

做法︰

1. 將乾酵母加入暖水中拌勻，放置10分鐘。
2. 將麪糰其他材料置入大碗內，加入酵母水搓勻至起筋 (拉開有薄膜)，推圓麪糰，收口向下，放在塗滿油的碗內，置於溫暖處 (約26至32度)發酵45分鐘。
3. 將麪糰拍摺成長形，讓麪糰鬆弛15至20分鐘。
4. 將麪糰按扁，分成兩份，一份加入適量藍莓果醬搓勻，用麪粉棍輾薄成6 吋x 24吋的長形，並於上面塗上適量的藍莓醬，另一份亦用麪粉棍輾薄成6 吋x 24吋的長形，將麪糰蓋在已塗果醬的麪糰上並輕輕壓實，麪糰兩邊向內摺1cm。
5. 將麪糰由上向下捲起，收口略為拖薄及壓實。
6. 放入已掃油的麪包模 (4吋 x6.5吋長方形焗模) 內，進行最後發酵 (置於溫暖處將約20至30分鐘)。
7. 待麪糰發酵至8成滿，輕手掃上蛋漿，放入已預熱至180度的焗爐焗15分鐘，再蓋上麪包模蓋或錫紙焗12分鐘，麪包出爐後脫模待涼。

比個LIKE我LIKE你︰
https://www.facebook.com/chengtszyingcooking

呢個食譜黎自︰
學左麪糰做法自己撞出來，哈。

蜜糖焗雞翼

燒野食成日都會有蜜糖雞翼，但因為蜜糖只係搽係表面同埋燒左一陣，蜜糖味硬係唔多入味咁。整呢個蜜糖焗雞翼係煩少少，但嚴格來講工序都唔算好多好難整，如果唔食咁甜，最尾可以唔洗掃咁次蜜糖其實。

材料︰
‧雞翼……12隻
‧蜜糖……適量 (掃面用)

(醃料)
‧生抽……2湯匙
‧糖……2茶匙
‧薑汁……1湯匙
‧紹酒……1茶匙
‧黑胡椒……適量
‧蜜糖……1湯匙

做法︰

1. 雞翼洗淨抹乾，用醃料 (除蜜糖外)拌勻，醃最少2小時。
2. 下1湯匙蜜糖至雞翼中拌勻，醃半小時。
3. 焗爐預熱至180度，焗盤內鋪2層錫紙。
4. 雞翼放入焗爐焗約10分鐘。
5. 反轉另一面再焗10分鐘。
6. 將焗爐加熱至220度，兩面掃上蜜糖焗5分鐘。
7. 再兩面掃蜜糖反轉多焗5分鐘，焗至金黃色取出即成。

比個LIKE我LIKE你︰
https://www.facebook.com/chengtszyingcooking

呢個食譜黎自︰
http://shirleyliving.mysinablog.com/index.php?op=ViewArticle&articleId=1252793

米米披薩

PIZZA本來就係好滯口既野食，變左用米飯來做餅底成件事就清新易入口好多，配料同之前焗PIZZA原理一樣真係你LIKE咩就加咩，今次用左個蜜糖芥末醬真係驚喜咁好食，沙律醬食得多係時候轉下口味啦。美中不足係餅底唔夠實淨下次轉用黏性再勁少少既珍珠米效果會更理想。

 



材料︰

‧白飯……1湯碗

‧飯素……3湯匙 (一般日本超市有售)

‧沙律醬……3湯匙 (我轉用左蜜糖芥末醬)

‧巴馬臣芝士碎……1/2碗

 

做法︰

1. 焗爐預熱至200度。
2. 白飯或冷飯用麪粉棍一端壓成有黏性。
3. 加入飯素，拌成飯糰。
4. 焗盤掃少許油，飯糰搓圓壓成9吋闊、厚約1/2吋的圓形，壓實些以免切開時鬆散。
5. 壓成餅底後加上醬料及其他配料 (可因應個人喜好加上不同的食材如雞柳、菠蘿等，如加生肉需事前略炒，是次加上辣肉腸及車厘茄) 及巴馬臣芝士碎。
6. 放入焗爐10至15分鐘至或面金黃色，取出後撒上適量飯素即成。(平底鑊做法︰燒熱平底鑊，加入一湯匙油，放入米披薩，蓋上鑊蓋，小火煎至底部金黃及芝士融化即可)

比個LIKE我LIKE你︰
https://www.facebook.com/chengtszyingcooking

 

呢個食譜黎自︰

http://sweetheartkitchen.com/recipes/rice-pizza/

 

 

日式薯仔沙律

薯仔沙律實乃本人飛佛，飽肚得來又唔算好肥 (唔算好，幾姐)，再加埋我至愛既粟米同清新青瓜片真係一流。不過刨青瓜薄片原來都唔簡單，大力少少就即斷，心急人如我都要學曉慢慢刨，下次再整，加少少黑椒碎應該更加惹味。

材料︰
‧薯仔……180g
‧蛋……1隻 (因為本人唔係得別好蛋，所以無落)
‧溫室青瓜……30g
‧鹽……少許
‧粟米……30g
‧蛋黃醬……1湯匙
‧巴馬臣芝士碎……半湯匙

做法︰

1. 溫室青瓜刨薄片，加少許鹽拌勻，放置一旁讓它出水備用。
2. 薯仔切半烚熟，稍微放涼去皮，用叉壓成蓉，放涼。
3. 蛋烚熟，放涼，切碎。
4. 薯蓉加入蛋黃醬、巴馬臣芝士碎及碎蛋拌勻。
5. 最後用匙羹把薯蓉弄成團狀放於碟上，並以青瓜薄片圍邊，放置雪櫃約1小時，取出即可食用。

比個LIKE我LIKE你︰
https://www.facebook.com/chengtszyingcooking

呢個食譜黎自︰
http://blog.yahoo.com/_IFDWZ26GUQ6BUVW3VBMKRXSPW4/articles/1270037